Vuosttaš skuvlabeaivi – 18. febr.

Odne lei vuosttaš skuvlabeaivi. Ledjen ikte ohcan juo biktasiid gárvvisin, vai lei dušše lihkkat, njuiket dusjii, borrat iđđesbiepmu ja vuolgit skuvlii. Dáppe lea skuvlasáhttu okta stuora van’a (biila).

(Govva van’as)

Beal ovccis vulggiimet biillain Nunavut Arctic Collegii (NAC). (Govva NAC)

Doppe dearvvahin Penny, gii bargá registreremiin, ja Neil, gii lea leamaš Guovdageainnus guokte jagi áige. Oidnen hálddahusas gova ovddit joavkkus gii lei lonohallamis, oahpaheaddjestudeanttat Juhán Niillas, Sara ja Aura. Somá oahpes ámádájuid oaidnit!

Mu klássas leat 5 eará studeantta, aivve nissonolbmot; Leeveena, Sanaaq, Brenda ja Amauyah. Okta ii boahtán odne. Hui hávski singuin oahpásmuvvat, orru hui vuogas joavku. Kursa lea juste seamma go mis lei čakčat, álgo lohkan- ja čállinoahpahus! Áidna erehus lea ahte dát kursa lea eŋgelasgillii!

Borranbottus fertiimet vuodjit ruovttoluotta internáhttii boradit. Dál mun gal čohkkájin skuvlaoappáid searvvis ja boradin.

Skuvla bistá juohke beaivvi gaskal 9.00 ja 16.00. Skuvlla maŋŋel fertet bargat ruovttubarggu. Mii oažžut nu ollu ruovttubarggu Leighas, ahte jáhkán mun in astta šat blogga čállit, dušše lohkat ja bargat bihtáid. Jus eat bargga ruovttubarggu, de gesset vulos árvosáni ja maŋemusat eai dohkket kurssa; it oaččo čuoggáid. Oalle garra njuolggadusat gal leat dáppe. Ii ábut obanassiige leat eret nu ahte ii dieđit ovdagihtii, muđui it oaččo čuoggáid.

Brenda válddii mu mielde márkanii, čájehii gos leat rámbuvrrit, kino, vuojadanhálla, kafea, bára, hotealla ja nu viidáset. Gávppošin dárbbašlaš diŋggaid, ovdal bijadin ruoktot fas.

Deiven ovtta dánska nissona kantiinnas, humadeimme dárogiela/dánskagiela. Fuobmájin man doaŋgasit hupmen dárogiela, jur heahpat, hehe. Ártet man jođánit olmmoš hárjána eŋgelasgillii.

Buohkat dáppe leat nu smáđáhkkát, moddját ja veahkkát. Olbmot moddjájit dutnje vaikke gosa manat, eai suvrá. Lean máŋgasa (áibbas amas olbmuid skuvlla feaskáris) dearvvahan; sii jearahit movt muinna manná, gos mun lean eret, manin lean dáppe jnv.

Vuosttaš skuvlabeaivi manai bures. Dál lea dušše bargagoahtit skuvlabargguid. Árvideames šaddet huššas vahkut ovddosguvlui, go eksámen lea njukčamánu 7. beaivvi, golmma vahku geahčen. Dassážii galggan ovdanbuktima nai čađahan, mii lohkko 25% mu árvosánis.

Wish me luck!