Ikte ledjen tvlanjas geahččame toy story 2. Filbma ádjánii sihkkarit lagabui guokte ja bealle diimmu, go ledje nu jalla ollu reklámat gaskkas, juohke 10. minuhta, in dájoge! Albma suhttadeaddji.
Diibmu viđas ledjen gaskabeivviid borrame. Kantiinnas nieiddat ja áhkut čohkkájit ovtta beavddis ja dievddut ja bártnit nuppis. Earet bárat, geat čohkkájit guovttá ovtta beavddis. Ja mun akto.
Gullen ikte ahte dat viesut nuppebeal luotta leat giddagasat. Okta lea nuoraid giddagas ja nubbi rávisolbmuide.. Ja go gehččen dárkileappot, de fuobmájin ahte leat stuora áiddit daid viesuid birra. Oavdu ledjege!
Dáppe jáhkket mun lean ruonáeananlaš. “Are you greenlandic?” leat máŋggas jearran. Oalle somá mu mielas. Sulástahtángo mun nu ládje sin? Fertejit leat mu alla nierradávttit ja finju čalmmit, hehe!
Mu latnja lea ihán galmmas! Lean geahččalan botnjat ommána juohkeládje, vai liegganivččii, muhto ii fal. Gullen orrunlanjas ahte earáin nai lea galbma latnja ja olles viesus bártidit galbmasiin. Ii leat gusto dušše mun, gii lean galmmeš.
Vajálduhtten muitaleames ahte Almonte, gos Kate ja Noel orruba, lea dovddusin leat dat sadji, gos basketballa hutke ! Doppe lea basketmusea ja visot! Jurddaš dan.
Go girdis čohkkájit, de ipmirdin manin Canadas lea ishockey nu stuorra sporta! Dan riikkas leat nu ollu smávva jávrrit ja jogažat! Dat sihkkkarit jikŋot hui johtilit ja de lea hui somá luistet daid alde. Noel muitalii ahte Ottawas manná okta johka gávpoga čađa ja das luistejit olbmot -bargui nai!
No comments:
Post a Comment