Matki Ottawas Iqaluitii

Sotnabeaivi 17.febr.08

Ikte olliime Noeliin Iqaluitii. Ottawa girdisiljus manai bures, moai innsjekkiime ja vácciime gateii. Doppe ledje Noelis oahpes olbmot, geainnna hupmagođii. Go boardinga álggii, de dajai Noel ahte son ii goit gille stresset ráidui čuoččehit. Na moai vurddiime ja humadeimme gitta fahkká álge munno čuorvut høyttalariin. Hehe, dat olbmot geat moai jáhkiime ledje ráidun Iqaluit-girdái ledje manname eará girdái ja girdišilljobargit ledje munno vuordime!! De gal logai Noel; Now it’s time to go, when they start to call you up!

Girdimátki manai bures. Vilges duoddarat nu guhkás go čalbmi oinnii! Lean veháš hirpmáhuvvan daid viiddis eatnamiid badjel!

Iqaluitas bođii Leigh ovddal. Son lea Noela oahpis, eŋgelasalmmái, ja maiddái oahpaheaddji NACas. Son galgá oahpahit dan kurssas, masa mun álggán, Language and Literacy. Dan botta go čuoččuimet ja vurdiimet gálvvu, de fas čurvo munno Noela namaid høyttaleris! Noel garrudii ahte dál dieđusge leat láhppán munno bagasja. Manaime jearrat mii lei, de čájehuvvui ahte soames lei sádden ovtta olbmá viežžat munno! Noel lei hirpmáhuvvan ja dajai lea buorre mearka; soames diehtá ahte mun lean boahtime.

Nunatta Residence lea namma dan sajis gos orun. Lea máilmme stuora viessu, dološ militearabáse viessu. Juohke lanjas čáhket njealjis orrut, nu ahte mu lanjas leat njeallje seaŋgga. Dáppe gávdno máimme stuora gymsála, gievrudanlatnja, kantiidna, dievva tv-lanjat, bassanlanjat ja basádanlanjat. Dieđát dat lea stuoris, go lea jurddašuvvon čáhkkehit máŋga čuođi soalddáha ja dás mii orrut, moaddelogi studeantta..!

Ledjen ikte Leigh ja su eamida luhtte gaskabeivviid borrame. Su eamit Kyu (son lea lulli-Koreas eret) gohkkii nu njálgga biepmu; scampi ja guoli. Lei hui hávskkes eahket, muhto mun ledjen nu váibbas. Logeáigge eahkes doalvvui Leigh mu ruoktot. Dajai vel ahte son sávvá munnje “a good night’s sleep” ja ahte vuoiŋŋastivččen ihttin! Dan sávven mun nai, go viimmat sutnjen seŋgii.

YEAH RIGHT! Ihkku manai buollinálárbma! Ledjen nu njálgát oađđime, go álggii juoga huikit, ja dakkár infernalska jietna ii lean leaika! Gal don dieđát mun ledjen áibbas guovtti ilmmi gaskkas ja imaštin mii hearráid nie ges álggii rigeret. Mannen feaskárii, guovlalin goabbátge guvlui ja oidnen ahte buollineastadanuvssat ledje giddejuvvon. De árvidin ahte dát ferte leat buollinálárbma. Na ruovttoluotta latnjii, gárvodit joggebuvssaid pysjamasbuvssaid badjel, ullobáiddi ja ulloliinni ja vázzát vulos. Vuollin čužžo dievva olbmot, muhtimat pysjamasbuvssaiguin ja teppen birra. Eat mii goit šaddan gitta olggos mannat, vaikko galggašii várra gal. Buollinčáskkadeaddjit bohte ja fitne iskame mii lei. Soames lei álárpma bidjan johtui iešmielat! Na mii fertiimet vuordit dassái jáddadedje álárpma ja mus nu nahkárat! Gávastin aht gávastin. Jetlag, árvideames. Diibmu lei beal golbma.

Odne lean boradan katiinnas frokosta. Albma american breakfast; french toast with syrup, omelett, bacon ja buđehat. Jus dainna lagiin joatkkan, de daiddan oba jorbbas go ollen ruoktot fas.

Dál lean goit mailen ahte lean dearvan Iqaluitas ja manná bures dáppe.