Giella-ájáhusat

Dál lean vuosttaš geardde ipmirdan movt dáčča dovdá go boahtá Sápmái. In ipmir maide maid dát báikeolbmot hupmet! Juohke sajis hupmet eanaš inuktitut, inuihttagiela. Sii seaguhit gal eŋgelasgiela nai, nu ahte mun ipmirdan muhtun sáni duollet dálle, muhto eanaš áigge geahčan gorutgielas mas lea sáhka.

Okta dain vuosttaš sániin, maid ohppen, ohppen oalle johtilit. Ii! Namalassii, “ii” mearkkaša jua inuihttagillii! Mearkkašin ahte go muitalin juoidá, dahje go jerren juoidá, de vástidedje skuvlaoappát dávjá “ii”. Ja mu oaivi lea hárjánan ahte “ii” lea ii, a-a. Ovdamearkka dihte ságastallan sáhtii leat ná:
Mun: “We are going to do these assignments now, right?”
Amauyah: “Ii”
Mun: No? Really? I thought we were going to.. (jorbbodan)
Hehe, manai muhtin áigi, de fertejin jearrat mearkkaša go “ii” a-a vai juo sin gillii. Gal de čielggai! Ii inuihttagillii lea “akka”, dego mis lea a-a.

Eará sátni lea kabloona, vilges olmmoš, dáčča. Leigh, min oahpaheaddji, atná dan sáni oahpahusas. Dieđusge go sus leat inuihtta ja sámi oahppit, de son lea áidna kabloona doppe, hehe.

Okta sátni, man galggan atnigoahtit dán rájes, lea Nuvvuqiula. Dat lea inuihtaid sátni sápmelažžii!! Jurddaš, dakkáraš sátni nai gávdno. Dat mearkkaša “pointy part of the boots”, olbmot geat vázzet njunnegápmagiiguin. Dás duohko lean presentereme iežan Nuvvuqiulan, iige “norwegian”. Goaski muitalii munnje ovdal vulgen, ahte gávdno sátni sápmelažžii, ja dál mun dieđán dan! Ožžon áibbas soaittáhagas diehtit nai, dat han lea nu ártet. Ledjen iskame maila, go goaski lei mailen munnje gova Baffin-sullo ekspedišuvnnas 1921:s. Čájehin mu skuvlaoabbái Leeveenai dan, ja muitalin fearána sutnje. Go son oinnii mailas ahte muhtin Nalluluq/Nalluq nammasaš olmmoš orru Iqaluitas, de son dajai; “That’s my family!” Leeveena bearaš lea dolin orron Amadjuakas, su áddjá bivddii ja jođii dain guovlluin! De dáidá leat nu, ahte munno máttut leat deaivvadan dalle guokte buolvva áige!! Imaš, amma lea?! Ja dál moai Leeveenain letne seamma klássas.

Dasa lassin Leeveena dajai ahte okta su fulkkiin lea náitalan sápmelaččain! Mu mielas diet fearán orru šaddame eanet aht eanet gelddolažžan. Son galggai jearrat su eatnis eambbo, nu ahte go mun dieđán eambbo, gal mun de muitalan. Nugo TVs láve oidnot: To be continued!