Dáppe lea ihán dálki dál! Viimmat bessen vásihit dan gullon “blizzard”!
Máilbmi olgun lea áibbas vielgat. Somá! Ja seammás láittas. Dat mearkkaša oainnat ahte eat beasa gosage. Taxi iige vuoje, danin go luodda deike Old resii lea giddejuvvon. Nu ahte olbmot dušše čohkkájit tv-lanjas ja bolsejit. Muhtimat gehččet tv, earát surfejit interneahtas. Mun lean boradan, surfedan interneahtas, bassan biktasiid, čorgen lanja, oppdateren blogga, ja viimmat vuollánin vel skuvlabargguid nai bargat! Beassášlávvordaga!! In leat ná jaskes, láivves beassášlávvordaga goasse vásihan! Vuosttaš ja sávvamis maŋemus geardde nai. Mus ledje eará plánat. Galgen Brenda lusa oahppat ráhkadit bannock, muhtin lágaš láibbi, ja su bearrašiin sosialiseret, muhto ii dat ábut go lea dálki. Čáledettiin čohkkán lanjastan, guldalan musihka ja boradan beassáš(šukuláda)moniid. Buorit beassážat!
Sáhtán baicce muitalit ságaid mannan vahkus. Nugo lean dadjan, de lean goarrugoahtán parkasa, dahje nu gohčoduvvon atigi. Bijan govaid goarrumis. Lea somá ja oahpan nu issoras ollu. Ovttamáno go cultural studies kursa álggii, de lean dovdan dego livččen ruovttus. Mii čohkkát klássalanjas, mii lea šaddan duodjelatnjan, ja šluppardit ilmmiid dáliid duddjodettiin. Áibbas earálágan go ovddit kursa, mii lei huššái, álohii vissis áigemeriiguin. Eva, oahpaheaddji, váldá diŋggaid gulul iige doamahala mainnage. Obanassiige lea hui vuogas kursa, masa liikon issorasat.
Mun arbevirolas amautiin ja mu kamiikaiguin. Nice, huh?! :)
Disdaga lea skuvla fas ja de dáiddán gárvet iežan atigi. Mii galgat čájehit buohkaide skuvllas iežamet dujiid bearjadaga. Leeveena lea gorron njuorjonáhkkegálssohiid iežas boadnjái, Layli lea ráhkadan rumbbu, Brenda lea gorron iežas golbma bárdnái guhtege atigi, ja mun lean gorron alccen atigi. Boahtte vahku mii galgat ráhkadit ulu, nissonolbmo niibbi. Šaddá speanta!
No comments:
Post a Comment